A nosa misión
![](/documents/4504507/4516118/monitor.png/5e6777fd-1b96-0a4d-30fd-569d5d75e016?t=1669231109062&download=true)
Administración dixital
En Concello Dixital, a nosa misión é contribuír á transformación dixital das nosas entidades locais e situalas nun escenario operativo de alta eficiencia e de excelencia na prestación dos seus servizos, mediante o impulso da Administración Dixital no seo da súa organización.
A nosa metodoloxía contempla a implantación de propostas transversais de transformación dixital en todas as áreas e servizos de cada concello e entidade local, que se axusten ás súas necesidades específicas. Á súa vez, este proceso de evolución tecnolóxica obriga a un acompañamento continuo das empregadas e empregados públicos no esforzo que supón a adaptación ao novo modelo de cultura organizacional necesaria para a consecución dos nosos obxectivos.
Os resultados obtidos nas intervencións realizadas nos concellos proxéctanse en dúas vertentes:
- Vertente interna: mellora na xestión e a eficiencia das entidades
- Vertente externa: mellora na relación entre administracións e destas coa cidadanía
![](/documents/4504507/4516118/local.png/5c8ac887-a9bd-7a01-34cc-872daef4a125?t=1669231109388&download=true)
Entidades locais
O deseño actual das competencias locais sitúa aos nosos concellos e entidades provinciais nun escenario continuo de evolución e adaptación dos seus servizos electrónicos co obxectivo de adaptalos ás demandas da cidadanía. Neste esforzo sitúase a misión de Concello Dixital de acompañar ás entidades na axilización da súa xestión, a interoperabilidade co resto das administracións e a mellora na calidade do servizo á cidadanía.
Aliñámonos coas profundas transformacións socioeconómicas experimentadas polas nosas entidades nos últimos anos, e que puxeron a proba a súa capacidade de resposta ante retos como a xestión, no marco das súas competencias, da crise sanitaria derivada da pandemia da COVID-19.
A nosa estratexia baséase no impulso dos fundamentos que permiten unha tramitación electrónica integral, desenvolvida ao redor da nosa plataforma de tramitación electrónica TEDeC, o conxunto de plataformas que forman parte do seu ecosistema, a implementación das integracións que permiten a súa interoperabilidade con outras administracións e o conxunto de servizos de apoio.
Este proceso de transformación non sería posible sen o diálogo continuo e a colaboración activa das empregadas e empregados públicos. A achega da súa experiencia constitúe a fonte principal da base de coñecemento do proxecto e das melloras da plataforma de tramitación, transferibles a todas as entidades participantes e que permiten a evolución continua do núcleo tecnolóxico sobre o que se asenta o proxecto.
![](/documents/4504507/4516088/nuestra-mision.jpg/6b1bb4a4-843c-2654-e56a-6fe52fb6b508?t=1669231451196&download=true)