Como foron estes meses de traballos de transformación dixital en Vedra?

Foron moi intensos e produtivos e creo que demos un paso adiante moi importante en canto a os servizos que se prestan de administración electrónica.

Como están percibindo estes cambios na xestión municipal as veciñas e veciños?

Precísase tempo para que estes cambios cheguen a todos. Quen non se tivo aínda que relacionar administrativamente co concello nesta nova etapa descoñece os servizos. Porén, as entidades asociativas do concello que xa levaban tempo utilizando o servizos dixitais en outras administracións si que están a facer uso dos novos servizos implantados no concello.

Por outra banda, a cidadanía sabe que este novo modelo de relación co seu concello vai ser de obrigado uso en moitos casos. Certo é que o descoñecemento do medio dixital dificulta o uso da administración electrónica, pero unha vez superada esta barreira ven todos os cambios como positivos e recoñecen a gran vantaxe que supón ter unha relación dixital co seu concello.

Está a afectar, entón, a “fenda dixital” ao uso dos servizos de Concello Dixital?

Penso que no noso concello a fenda dixital está a ter menos impacto do poderiamos agardar. Isto débese a dous motivos: primeiro, a pandemia impulsou o uso dos dispositivos dixitais entre os nosos maiores e fíxolles ver a necesidade de asumir este medio para relacionarse coas súas administracións. Por outra banda, no noso concello existía un problema de conectividade pero na actualidade o 80% das veciñas e veciños teñen acceso á fibra óptica nos seus fogares.

O reto que temos por diante para reducir a fenda é difundir os servizos de administración dixital e que cidadanía os entenda e utilice. No caso dos maiores, estamos a comprobar que se fan usuarios dixitais moi activos cando dispoñen de sinatura dixital e coñecen os fundamentos básicos da tramitación electrónica.

A Oficina Cl@ve é xa unha realidade en Vedra. Está a ter boa acollida e uso?

A creación desta oficina supuxo un importante fito dentro do proxecto Concello Dixital en Vedra xa que a cidadanía e consciente das súas vantaxes, principalmente o feito de non ter que desprazarse do seu concello para obter a súa credencial dixital e así poder acceder o amplo catálogo de servizos dixitais, entre eles os que ofrece a Sede Electrónica do concello.

Cales son os servizos máis utilizados na Sede Electrónica Municipal?

Detectamos un boa tendencia a alza de uso do Rexistro, sobre todo en trámites relacionados coas áreas de Urbanismo e Servizos Sociais.

Observa máis interese e implicación da cidadanía na xestión do seu concello dende a chegada da eAdministración?

O grao de transparencia na xestión municipal que se acada con este novo modelo, no que os datos están ao dispor das cidadás e cidadáns dende o ordenador do seu fogar ou o seu móbil, fai se amosen máis activos e implicados.

Por outra banda, a axilidade no acceso á información que supuxo a dixitalización foi un factor que contribuíu a popularizar o uso dos novos servizos por parte dos grupos políticos e cargos electos, que poden acceder directamente á documentación de modo telématico e con inmediatez.

A pandemia puxo a proba a axilidade e flexibilidade das entidades locais. Como afronta o Concello de Vedra os escenarios de cambio continuo que nos agardan?

Vedra sempre foi un concello moi aberto e participativo. O mérito é da cidadanía e da grande vocación de servizo das empregadas e empregados públicos que sempre atenden á veciñanza cando o precisa. Pola súa banda, a veciñanza tamén sempre amosa un alto grao de adaptación as circunstancias, tanto as establecidas, como os horarios de servizo, ou as sobrevidas, coma a pandemia.

Fáganos unha reflexión final sobre estes meses de proceso de implantación de Concello Dixital en Vedra

Estou moi satisfeito cos resultados acadados e gustoume especialmente a colaboración entre o persoal, que foi esencial para que ninguén quedase atrás neste camiño. Sorpréndeme que en tan pouco tempo avanzaramos tanto e tan ben en prol da transformación dixital do concello.